Беларуская лёгкаатлетка расказала пра сваю любоў да роднай мовы

Прадстаўніца скачкоў у вышыню Карына Дзямідзік ў інтэрв'ю Bet News распавяла пра свае адносіны да беларускай мовы:

— Так, ужо вельмі даўно мой Instagram беларускамоўны, і я гэтым ганаруся. Беларуская мова са мной з нараджэння, бо я вельмі часта была ў бабулі ў вёсцы і шмат праводзіла з ёй часу — дзякуючы ёй я люблю сваю родную мову. Мая радавая вёска называецца Гарадзішча і знаходзіцца ў Ляхавіцкім раёне, там вельмі файна. Ды і калі казаць у цэлым, то ў маім дзяцінстве практычна ўсе гаварылі на беларускай мове, ну і на трасянцы. Таму гэта была норма для мяне.

Вядома, потым гэта стала ўжо не модна, і ў школе ты лічылася «вёсачкай», калі гаворыш па-беларуску — так і вынішчаюць гэтую цудоўную мову. У школе ў мяне з рускай мовай неяк не складалася, і я заўсёды лічыла, што беларуская мне бліжэй і лягчэй. Таму і здавала яе на тэставанні пасля 11-га класа. Я нават да рэпетытара па хіміі хадзіла, які выкладаў у беларускай школе.

Фота: старонка Карыны Дзямiдзiк у Instagram.